Најтоплиот 13 ноември од 1950 година. Од сабота заладување
Скопје имаше 26,6 степени, речиси пет над досегашниот рекорд за овој датум.
Македонија во петокот, 13 ноември 2026, го имаше најтоплиот 13 ноември откако постојат споредливи мерења, од 1950 година. Уште во 10 часот наутро во Скопје и во Гевгелија беа измерени по 22 степени.
Во ажурирањето во 19 часот платформата climate.mk запиша дневен максимум од 26,6 степени за Скопје. Тоа е највисоката вредност меѓу сите локации што ги следи и е 4,8 степени над досегашниот рекорд за истиот датум. Претходно најтоплите 13 ноември беа во 1969 и во 2015 година, со по 21,8 степени.
Додека кај нас беше речиси летно, Хрватска доби снег. На хрватските планини во текот на ноќта се очекуваа до 30 сантиметри снежна покривка, а на јадранскиот брег силна бура.
Управата за хидрометеоролошки работи најавува дека топлото време ќе попушти веќе во сабота. Падот на температурите ќе биде најизразен во северните делови на државата.